Në përkujtim të 80-vjetorit të rënies së dëshmorëve gjatë qëndresës së armatosur kundër agresionit fashist, Muzeu Historik Kombëtar në bashkëpunim me gjimnazin “Petro Nini Luarasi” organizoi aktivitetin me titull “80 vite nga pushtimi italian”.
Përkujtimi i luftrave heroike në mbrojtje të atdheut nga pushtimi i italianëve fashistë u realizua nëpërmjet pjesëmarrjes së historianit Dr. Moikom Zeqo, drejtorit të Muzeut Historik Kombëtar, Dr. Dorian Koçi, interpretimeve dhe referimeve të gjimnazistëve, si dhe nëpërmjet ilustrimeve të fotografive të dëshmorëve të rënë. Për herë të parë për publikun u prezantuan disa fotografi të Mujo (Cakuli) Ulqinakut të mundësuara nga pasardhësit e tij.
Në këtë veprimtari ishin të pranishëm dhe të ftuar dashamirës të fushave të ndryshme.
Dr. Dorian Koçi, drejtori i Muzeut Historik Kombëtar, përveç të tjerash tha se, “Ideatori kryesor i pushtimit të Shqipërisë nga Italia fashiste ishte konti Galeazzo Çiano, dhëndri i Benito Musolinit, të cilit i lindi ide¬ja për një “zgjidhje tërësore për Shqipërinë”. Pushtimi fashist italian më 7 prill 1939, ishte një ndër aktet e para agresive të fashizmit në Europë. Luftimet më të përgjakshme u bënë në Durrës, por edhe në Shëngjin, Vlorë e Sarandë. Në Durrës trupat italiane u pritën me zjarr nga Mujo Ulqinaku, Hamit Dollani etj.”
Dr. Moikom Zeqo bëri një panoramë të zgjeruar sesi erdhi pushtimi fashist në Shqipëri dhe hapat e ndërmarra nga populli shqiptar në luftën kundër fashistëve italianë, duke vlerësuar këtu edhe kontributin e Heroit të Popullit, Mujo Ulqinaku.
Znj. Olsa Ulqinaku, stërmbesa e Mujo (Cakuli) Ulqinakut, në fjalën e saj përshëndetëse midis të tjerash tha se: “Dëshmorët e Luftës Antifashiste Nacionalçlirimtare janë jo vetëm simbol i pashlyeshëm i rezistencës kombëtare dhe luftës për liri, por edhe frymëzim për ne brezat e sotëm. Gjaku i derdhur nuk do të shkojë dëm dhe sakrifica do të ketë kuptim, ndaj, na takon ne nipërve dhe mbesave, ne stërnipërve dhe stërmbesave që të ruajmë të freskëta këto mesazhe heroizmi e qëndrese”.
