Në kuadër të Vitit Mbarëkombëtar të Gjergj Kastriotit Skënderbeut, Ministria e Kulturës, Muzeu Historik Kombëtar dhe Galeria Gjikondi çelën dje ekspozitën e piktorit Vangjel Gjikondi, e cila i është kushtuar figurës së Heroit tonë Kombëtar Gjergj Kastriotit Skënderbeut. Në ciklin “Historia e Skënderbeut” dhe “Rrethimi i Shkodrës”, autori ka realizuar rreth 60 piktura me format të madh.
Gjergj Kastrioti Skënderbeu ka qenë mbrojtës i krishterimit dhe i qytetërimit perëndimor. Ai është një figurë e madhe historike, prandaj të gjithë veprat e artit dhe literatura që i është kushtuar atij e meritojnë të hyjnë në kujtesën e kulturës botërore. Këtë vit, që përkon me 550-vjetorin e vdekjes së Gjergj Kastriotit Skënderbeut ka pasur prurje të shumta në art dhe në letërsi. Një nga këto prurje të reja është edhe ekspozita e piktorit Vangjel Gjikondi, që përuruam dje në ambientet e Muzeut Historik Kombëtar. Ekspozita fillon me lindjen e Skënderbeut duke vijuar betejat e shumta, gjatë të cilave ai doli fitimtar. Krahas fitoreve historike të heroit tonë kombëtar, autori ka pasqyruar me vërtetësi dhe realizëm edhe dhimbjet gëzimet edhe trishtimet e tij.
