“Fëmijët dhe Kryqi i Kuq”. Nën këtë moto në Hollin Kryesor të Muzeut Historik Kombëtar u hap ekspozita me punime nga nxënësit e shkollave 9-vjeçare të kryeqytetit. Ky aktivitet i paraprin datës 8 maj që është dhe dita ndërkombëtare e Kryqit të Kuq. Disa dhjetra punime me motive nga humanizmi ishin pjesë përbërëse e koleksionit, i cili u ekspozua në hollin e Muzeut. Një juri profesionale vlerësoi nxënësit me çmime. Ceremoninë e hapi Presidenti i Kryqit të Kuq Shqiptar, z. Ylli Alushi, i cili falenderoi për bashkëpunimin Drejtorinë Arsimore të kryeqytetit dhe drejtoritë e shkollave pjesëmarrëse në aktivitet, u ndal për të falenderuar në veçanti dhe Muzeun Historik Kombëtar si dhe drejtorin e institucionit z. Dorian Koçi për mundësinë dhe kushtet në të cilat u zhvillua aktiviteti në fjalë. Këtë ceremoni e përshëndeti edhe drejtori i Muzeut Historik Kombëtar, Dr. Dorian Koçi, i cili ndër të tjera tha se: “Është një kënaqësi mjaft e veçantë për Muzeun Historik Kombëtar të bëjë të mundur dhe të jetë bashkëorganizues i kësaj ekspozite kaq të bukur të piktorëve më të rinj. Muzeu Historik Kombëtar, prej shumë kohësh, ka filluar një program dhe që është një prioritet kombëtar tashmë, që është “Edukimi përmes kulturës”. Dhe unë do t’ju bëja thirrje që përveçse ekspozimit në Muzeun Historik Kombëtar, ne kemi pavijone të mrekullueshëm ku mund të bëni një udhëtim në historinë tonë të çmuar kombëtare”.
Aktiviteti u përshëndet edhe nga z.Olger’t Rakipllari, Kryetar i Jurisë së konkursit, dhe znj.Zhulieta Muçollari, Sekretarja e Degës Tiranë të Kryqit të Kuq Shqiptar.
