Në kuadër të 75-vjetorit të çlirimit të atdheut në Muzeun Historik Kombëtar mes studiuesish, gazetarësh, diplomatësh dhe dashamirës u promovua një libër me vlera të mëdha historike, “Pena të lirisë -Krijime të autorëve dëshmorë”, botim i Organizatës Kombëtare për Dëshmorët e LANÇ-it dhe Dëshmorët e tjerë të Atdheut.
Për të folur mbi këtë libër ishte një panel i zgjedhur, i përbërë nga: Drejtori i Muzeut Historik Kombëtar, Dr. Dorian Koçi, Zv.Ministri i Mbrojtjes i Republikës së Shqipërisë, z. Petro Koçi, Prefektja e Tiranës, znj.Suzana Jahollari, Akademiku Moikom Zeqo, Nënkryetari i Bashkisë Tiranë, z.Andi Seferi, dhe Nënkryetari i Organizatës Kombëtare të Dëshmorëve të Atdheut, z. Shaqir Vukaj.
Në fjalën e tij përshëndetëse Drejtori i Muzeut Historik Kombëtar, Dr. Dorian Koçi, u shpreh: “Të nderuar pjesëmarrës ndihem i privilegjuar të marr pjesë në këtë aktivitet dedikuar poetëve dhe shkrimtarëve tanë dëshmorë që është plejada e rëndësishme që bënë Luftën Antifashiste Nacionalçlirimtare në Shqipëri. Lufta dhe ata që u përfshinë bënë detyrën kryesore ndaj atdheut duke dhënë jetën, dhe gjithmonë do kenë nderimin, mirënjohjen dhe respektin e popullit shqiptar”.
Nënkryetari i Organizatës Kombëtare të Dëshmorëve të Atdheut, z.Shaqir Vukaj u shpreh se: “Jemi mbledhur sot, për tu përulur përpara dëshmorëve të vendit të cilët luftuan me nder dhe trimëri për çlirimin e vendit, respekti ndaj tyre është detyrë e çdo shqiptari të ndershëm e patriot”.
Ky libër përmbledh autorë dëshmorë të viteve të Luftës Antifashiste Nacional Çlirimtare, si dhe të tjerë të rënë në trojet etnike të hapësirës mbarëshqiptare në përpjekjet e tyre per liri, pavarësi e prosperitet.
Ky aktivitet është një organizim i përbashkët i Organizatës Kombëtare për Dëshmorët e LANÇ-it dhe Dëshmorët e tjerë të Atdheut dhe Muzeut Historik Kombëtar.
