Muaji nëntor është muaji i festave kombëtare. Në kuadër të 75-vjetorit të çlirimit të atdheut në Muzeun Historik Kombëtar mes studiuesish dhe dashamirës u promovua një libër me vlera historike, “Yjet e Ramicës” i autorit Prof. Dr. Bernard Zotaj.
Fjala e hapjes u bë nga vetë autori i librit, z.Bernard Zotaj, i cili u shpreh se: “Ky libër i kushtohet dëshmorëve në kuadrin e 75-vjetorit të çlirimit të Atdheut, duke vënë theksin tek populli i fshatit Ramicë në qarkun e Vlorës në vitet e Luftës Antifashiste Nacionalçlirimtare. Fshati Ramicë u bë bazë dhe mbështetje e fuqishme e Luftës më të rëndësishme dhe jetike për fatet e shqiptarëve, kontribuoi e dha një ndihmesë të çmueshme”.
Ky libër sjell në memorien tonë historinë e luftës për mbijetesë, përpjekjet për të ruajtur dhe zhvilluar identitetin kombëtar, e sakrificat e mëdha për liri e mëvetësi. Është historia e heronjve të këtij kombi, historia e dëshmorëve të tij. Kjo është historia e një populli të mbijetuar në mijëra vjet në një mjedis shpesh herë asgjësues, por sakrificat e martirëve të tij është shpërblyer.
