Ekspozitë, me harta e libra të koleksionistit Panagiotis Koliomichalis, të Bibliotekës Gennadius në Athinë dhe koleksioni i Patricia Nugee për Skënderbeun, prezantimi i librit të studiuses greke Makis Paizi Apostolu për Skënderbeun dhe një kumtesë “Skënderbeu dhe Europa” në emër të Muzeut Historik Kombëtar nga drejtori Dorian Koçi në auditorin e Shkollës Amerikane të Studimeve Klasike në Athinë përkujtuan 550-vjetorin e vdjekjes së Skënderbeut në Athinë.
Një organizim i shkëlqyer nën kujdesin e Dr. Maria Georgopulos, drejtoreshës së Gennadius Library dhe Znj. Ardiana Hobdari, Ambasadorja shqiptare në Athinë. Në këtë aktivitet morën pjesë trupi i huaj diplomatik i akredituar në Athinë, studiues dhe miq të Shqipërisë.
Në fjalën e saj, Ambasadorja Hobdari vuri në dukje se përmes kësaj ekspozite, mund të kemi një pamje të asaj sesi historianët dhe jo vetëm e kanë parë figurën e Skënderbeut, si një simbol i qëndresës për liri dhe burim frymëzimi për mbarë Evropën. Nga ana e tij drejtori i Muzeut Historik Kombëtar, Dr. Dorian Koçi, nënvizoi se vepra e Skënderbeut solli si rrjedhojë krijimin e një ideje të përbashkët evropiane për unitet, ndërsa të panumërta ishin referencat lëvduese ndaj tij në veprat letrare evropiane.
