Muzeu Historik Kombëtar në bashkëpunim me Muzeun e Bukureshtit dhe Fakultetin e Historisë dhe të Filologjisë, Universiteti i Tiranës, organizuan leksionin e hapur me temë: “Fytyrat e Bukureshtit: Ndryshimi i pejsazheve të qyteteve dhe jeta e përditshme”.
Aktivitetin e përshëndeti Eva Tafili (Hyskaj), Drejtuese e Departamentit të Historisë në Fakultetin e Historisë dhe Filologjisë, Universiteti i Tiranës, e cila falenderoi Muzeun Historik Kombëtar dhe drejtorin, Dr. Dorian Koçi, për organizimin e këtij aktiviteti. Gjithashtu, znj.Hyskaj falenderoi edhe Muzeun e Bukureshtit për ndarjen e leksioneve me studentet e departamentit të historisë në Fakultetin e Historisë dhe Filologjisë.
Ndër të tjera, Dr.Dorian Koçi, Drejtor i Muzeut Historik Kombëtar, pasi bëri një retrospektivë të shkurtër të jetës së z.Adrian Majuru, Drejtorit të Muzeut të Bukureshtit, njoftoi edhe për aktivitetet e pasdites që do të organizohen në Muzeun Historik Kombëtar; hapja e ekspozitës “Hello, my name is Bukur Esht” dhe koncerti me pjesëmarrjen speciale të sopranos Arlinda Morava dhe Ansamblit të Universitetit të Arteve në Tiranë.
Z.Adrian Majuru është diplomuar në histori në Universitetin e Bukureshtit. Ai ka kryer studime pasuniversitare në histori si dhe ka mbrojtur Doktoraturën, pranë Universitetit të Bukureshtit në vitin 2005. Majuru ka përfunduar studimet Post-doktorale në kuadër të projektit “Vlerësimi i identiteteve kulturore në procesin e globalizimit”. Ka marrë titullin si Profesor i Asociuar, Departamenti i Planifikimit Urban, Universiteti i Arkitekturës dhe Urbanizmit “Ion Mincu” – Bukuresht, që nga tetori i vitit 2009. Është kryetar i Shoqatës për Antropologji Urbane që nga viti 2007.
Midis të tjerave, Prof. Majuru tha: “Faktori kulturor formon përbërjen e njeriut me të cilën kanë lindur, gjatë periudhave të ndryshme kohore. Njeriu vetë informohet me vetëdije ose pa vetëdije, sipas burimeve që ka poseduar që kur ka lindur, sipas gjendjes së tij vetjake dhe rrethanave në të cilën jeton. Ekziston një hero i gatshëm për të ndërhyrë për të shpëtuar situatën. Sidoqoftë, duke e lënë mënjanë botën imagjinare dhe humorin e momentit, njerëzit ndiejnë një zbrazëti të madhe të brendshme, e cila pritet të ri-humanizohet përsëri. Një brez i cili i jep fund indiferencës, si dhe performancën profesionale, mund të bëjë gjthçka të mundur.”
Në fund të aktivitetit Prof.Majuru i dhuroi disa libra mbi historinë e Rumanisë, bibliotekës së Departamentit të Historisë në Fakultetin e Historisë dhe Filologjisë, Universiteti i Tiranës.
