“Roman befasues”, do ta cilësonte Dorian Koçi, romanin e fundit të Odise Kotes, i cili u promovua në sallën UNESCO të Muzeut Historik Kombëtar. Madje ai shtoi se e ka lexuar dhe rilexuar me kujdes këtë krijim të ri që i bashkangjitet letrave shqipe, në një kohë ambicjesh ku çdo shkrimtar kërkon lexuesit e tij.
Në një atmosferë letrare, me të ftuar të shumtë, shkrimtari Odise Kote me rezidencë në Gjirokastër preferoi që romanin e tij të fundit ta prezantojë në Tiranë. Në panelin e kësaj veprimtarie ishin emra të njohur ku përveç autorit dhe botueses Irena Toçi, ishin dhe Diana Çuli, Dorian Koçi, Behar Gjoka e Ben Andoni.
“E përgëzoj autorin pasi ka krijuar një tipologji të veçantë, në një roman ku flitet për një Gjirokastër multikulturore, me një leksik të rrallë e cila ka fituar qytetarinë nga pena e Odise Kotes”, tha në fjalën e tij përshëndetëse drejtori i Muzeut Kombëtar, z.Dorian Koçi. Ai theksoi gjithashtu se në këtë roman autori priret nga remineshenca e Realizmit Magjik e ku shumë rëndësi merr dhe dialogu i hapur i cili nxjerr në pah anatominë e keqe të së shkuarës.
Romani e vendos subjektin në kohën e ndryshimeve social politike në Shqipëri, në fund të viteve ’40 të shekullit të kaluar, duke e vendosur në qytetin e Gjirokastrës. Rreth një ngjarjeje të vetme – zhdukjes së bankierit Petro – vërtitet një botë e madhe dhe e pasur në zhbirime psikologjike, në kolorit lokal, ku jeta e panjohur dhe e papritur që po vjen, po shemb të gjitha pikat e mëparshme të referencës.
“Romani, pavarësisht atmosferës sureale – që në të vërtetë është reale, por tingëllon si e tillë, për shkak të veçanësisë së Gjirokastrës dhe këtu duhet të rrekemi e të kuptojmë se ku mbaron e veçanta dhe ku fillon fantazia, gjë aspak e lehtë – ka një galeri shumë interesante personazhesh”, tha mes të tjerash shkrimtarja Diana Çuli. Ajo shtoi se “romane të tilla, janë një prurje entuziaste në lëvrimin e vazhdueshëm të letërsisë sonë, janë shpresa se letërsia shqipe, megjithë uljet e ngritjet e saj, gjithnjë ngre kokë me vlera artistike dhe me seriozitet”.
Studiuesi Behar Gjoka do të bënte një analizë më të detajuara të të gjithë romanit. Ndërsa publicisti Ben Andoni do të vlerësonte dialektin e zonët të hedhur në roman që ai e cilësoi si “mrekullia e shkrimit”. Në prezantim foli dhe gazetari i njohur Aleksandër Çipa.
Autori i cili e mori fjalën i fundit, falenderoi shtëpinë botuese “Toena”, redaktorin Arben Bllaci, piktorin e kopertinës së librit Bashkim Ahmetin dhe tha se ngrohtësia e një promovimi të tillë i jepte kurajo të mëtejshme për të vijuar me risi të tjera në krijimtarinë e tij.
