Nxënësit që nuk Dëgjojnë u përfshinë në projektin “Vizatoj Historinë” inicuar nga Muzeu Historik Kombëtar. Ky grup iu bashkua kështu nxënësve të shkollave “Hasan Prishtina”, “Gjon Buzuku”, “1 Qershori”, “Naim Frashëri”, “Konferenca e Pezës”, “7 Marsi” “Mihal Grameno”,“Avni Rustemi” dhe “Kongresi i Manastirit”. Projekti, i cili nis me një guidë në pavijonet e Muzeut vazhdon me përcaktimin e një vendi, si këndi më i mirë nga ku mund të shohin objektet e t’i vizatojnë. Ky është projekti, i ideuar nën logon “Vizatoj Historinë”, që 50 nxënës të përzgjedhur nga 10 shkolla 9-vjeçare të kryeqytetit do të zhvillojnë me Muzeun Historik Kombëtar. Vetë institucioni i Muzeut, është treguar i gatshëm të hapë dyert për ta. Nxënësit lihen të lirë të zgjidhnin vetë objektet që do të vizatonin. Në javët në vazhdim ky projekt do të përfshijë nxënës të shkollave të ndryshme të Tiranës. Në përfundim, këto punime do të publikohen në faqen e facebook-ut të Muzeut, ku do të votohet punimi më i mirë. Në fund ky projekt do të finalizohet me një ekspozitë ku do të pasqyrohen të gjitha punimet e nxënësve ku për tre më të votuarit muzeu do të çmime simbolike.
